Mingutsitsinngitsumut ikaarsaariarneq ataatsimoorfigalugu - CO2-mik 140 sinnerlugu aniatitsinnginneq

Nukissiorfiit inuiaqatigiit kalaallit innaallagissamik, imermik aamma kiassaanermik pilersorneqarnissaat suliaraat, ingammik imermit nukissiaq nunami maani nukissiatut pingaarnertut/annertunerpaatut pissarsiarineqarsinnaasoq qitiutillugu. Nukissiorfiit Nuummi Utoqqarmiut Kangerluarsunnguanni imermit nukissiorfimmit nukissiamit annertunersumik pilersuipput, taassuma eqqaaniittumi tatsimi imeq innaallagianngortinneqartarluni. Tamanna silap pissusianut pitsaasuuvoq minnerunngitsumillu inuiaqatigiit aningaasaqarniarnerannut. Taamaattumik CO2-mik aniatitsinerup illoqarfimmi Nuuttut ittumi annikillisinneqarnissaa annertuumik ilimanaateqarpoq nukissiami Utoqqarmiut Kangerluarsunnguaneersumik atuinikkut.

Taamaattumik Nukissiorfiit Hotel SØMA aamma Sømandshjemme suleqatigalugit aallartippoq, taakkua nukissiaq kissarsuummit uuliatortumit pissarsiarisartagartik taarsissavaat, uunnaavissuarmik innaallagiatortumik taarsiullugu ikkussuinermikkut taassuma nukissiaq atugaa annertunerpaaq tassaassaaq sarfaq Utoqqarmiut Kangerluarsunnguaneersoq silaannarmik mianerinnittoq. Taamatut kiassaaneq pillugu isumaqatigiissuteqarnerup kingunerissavaa Hotel SØMA maannakkut ukiumut CO2-mik 142 tonsit miss. aniatitsinerminit appartitsissaaq ukiumut CO2-mik 1 tonip missaanut, tamannalu hoteliutillit nuannaarutigaat: 

- Hotel SØMA aamma Sømandshjemmet ukiuni amerlasuuni inuttut inuunermi atajuartitsinermik suliaqarsimavoq. Hotel SØMA-mi ullut tamaasa mingutsitsinnginneq aamma atajuartitsineq sulissutigiuarparput, kiisalu Nukissiorfiit suleqatigalugit Nuummi alloriaqqippugut silap pissusianik aamma avatangiisinut tunngatillugu atajuartitsinermik. Nukissiorfinnit suleqateqarnerput nuannaarutigaarput ingerlanitsinnut tamatumunnga aamma mingutsitsinngitsumut ikaarsaariartornermut annertuumik peqataammat, hotelimi pisortap tullia Morten Bøgh Munkholm, oqarpoq.

Maannakkut kissarsuut uuliatortoq Hotel SØMA-mik kiassaanermik pilersuisuusoq, taamaallaat sillimmatitut atorneqalissaaq. CO2-mik 140 tonsimik sinneqartumik aniatitsinerup annikillinera aammattaaq Nukissiorfinni nuannaarutigineqarpoq: 

- Isumaqatigiissut taanna Nukissiorfiit nuutsitsiartornermik suliaqarneranut pingaaruteqarpoq. Mingutsitsinngitsumut ikaarsaariartornermut alloriarneq pingaaruteqarpoq. Mingutsitsinngitsumut ikaarsaariartorneq Nukissiorfiit kisimiillutik ingerlassinnaanngilaat. Taamaattumik aammattaaq assut nuannaarutigaarput Hotel SØMA assut akuersaarnerat aamma piviusumik soqutigisaqarnerat mingutsitsinngitsumut ikaarsaariarnissamut tunngatillugu allanngortitsiniarnerat. Silaannaap pissusianut tunngatillugu suuniuteqarnerminnut tunngatillugu annertuumik akisussaassuseqarnermik takutitsipput, kiisalu tamanna suliniummut tunngatillugu Hotel SØMA-mik suleqateqarnerput assut nuannaarutigaarput, nunap immikkoortuani pisortaq, Filip Sivertsen, oqarpoq.

Nukissiorfiit ukioq manna suleqatigiinnissamut isumaqatigiissutinik assingusunik isumaqatigiissuteqarnissartik naatsorsuutigaat aamma qilanaaralugu pisussaaffeqarluni suleqatigiinnissap annertunerusumik qitiutinneqarnissaa, Kalaallit Nunaanni suliffeqarfiit akunnerminni mingutsitsinngitsumut ikaarsaariarnermut iluaqutaasumik aamma inuiaqatigiit aningaasaqarnikkut  aningaasaliissutigisimasaat eqqarsaatigalugit.