2020-mi minguitsuussutsimut nuannaarutaasumik, innuttaasunullu iluaqutaasumik, minnerunngitsumillu pilersuinerup isumannaatsuutinnissaanut Ammassivimmi seqerngup qaamarnganik tigooraassutit batteribankilu (sarfamik toqqorsivik) Nukissiorfiit ivertippai.
2023-mi ingerlatsivimmut suli ilanngussassamik Nukissiorfiit suliamik nangitsisimavoq, tassaalluni anorisaat SD Wind Energy 15 kW-ilik. Ulluni makkunani anorisaammik iversitsineq Nukissiorfiit ulapputigaa, aasarlu manna taassuma atuutsilernissaa qilanaaralugu.
Kujataanut nunap immikkoortuanut pisortaq Lars Hoffmeyer oqarpoq: ”Ammassivimmi akulerussatut ingerlatsivitsinni ilaasussap anorisaatip nutaap inississornera aallartikkatsigu nuannaarutigaara. Tassaavoq maannakkut sarfaliuutitsinnik dieselitortunik taakkuninnga ingerlatsinitsinnut assut pingaaruteqartussaq. Ukiup ingerlanerani sarfaliuutit ulluni arlalinni qamissinnaasalissavavut, taamaalillutalu ingerlatsinermi nal. akunnerinik sipaaruteqarluta, aammalu sarfaliuutitta dieselitortut atorsinnaassusaat sivitsorlutigu.”
Seqerngup qaamarnganik tigooraassutit batteribankilu peqatigalugit anorisaat nutaaq ukiumoortumik dieselimik 22.075 literimik sipaaruteqarnermik angusaqarsinnaassasoq Nukissiorfiit naatsorsuutigaa, tassaasumik ukiumut 59 tonsinik missiliuutigisatut CO2-mik sipaaruteqarneq.
Nukissiornermut pisortaq Cicilie Senderovitz oqarpoq: ”Maannakkut Ammassivimmi atajuartussatut nukissiornermut suliniuterput tassaavoq suliniut Nukissiorfiit iluani tulluusimaarutigisarput. Erngup nukinganik nukissiorfinnik suliniutitsitut ittutut angisoorsuartut minguitsunngortitsiniarluni suliniutaanngilaq. Ammassivimmili suliniut tassaavoq suliniut pingaaruteqartoq – sumiiffiusumi ingerlatsinitsinnut piinnarani, aammali Kalaallit Nunaanni minguitsunngortitsiniarnermik pingaartitsinitta pisariaqartuuneranik paasisaqarnissamut pingaarutilik. Iluarsiissummi tassani iluaqutissat amerlapput. Batteribanki sillimmatitut atuuppoq, soorlu sarfaliuutit dieselitortut iluarsaatissagutsigit, piffissallu ilaani taakku qamivissorsinnaalissavavut. Tassaavoq silap pissusaanut iluaqutaasussaq, aammali sarfaliuutit dieselitortut qasunartartutut pisorpalunneranut iluaqutaalluni. Ammassiviup oqqumukaalernera, aamma minguinnerusumik nukissiornermut tunngatillugu iluarineqalernissaa qilaraaraakka”.
