Ullumikkut nunarsuarmi sulisartut ulluannut, ull. 1. maajimut tunngatillugu Nukissiorfiit iluanni sulisorisagut pikkorissut tamakku uagut Nukissiorfinniittugut nersualaarniarpagut/samminiarpagut. Taakku ilagaat Suulut Geisler, Ilulissani nunaqarfinnut suleqatigiinni aqutsisuusoq, aamma kiassarnermut immikkoortoqarfimmut akisussaaffeqartoq. Suleqatigiinni aqutsisutut ingerlatsinermi sulisugut pikkorissut allat ilagalugit Suulup Ilulissani, aammalu nunaqarfiini innuttaasunut uniuitsumik pilersuinerup attannissaa isumagaa. Tamannalu tassaasinnaavoq suliassaq assigiinngiiaartupilussuaq:
”Nukissiorfinni sulineq pissanganarlunilu assut assigiinngiiaarpoq, tamaanimi allaffimmi soorlu sanaartugassatut suliniutinut tunngasunik aallusserujoornissamut periarfissaqartarpunga, aammalu ingerlatsinermik sulisunit misilittagalinnit allanit tamakkunanit ilinniagaqarsinnaallunga. Ulluni allani assersuutigalugu nunaqarfinni ingerlatsivinniittarpunga, tamaani erngup aqqutaanik pingaannginnerusut, motoorinik aserfallatsaaliuinerit allarpassuillu pillugit ilisimasarpassuarnik pissarsisarlunga. Assut ilinniarfiginarpoq,” suleqatigiinni aqutsisutut sulineq pillugu aperineqarnermini Suulut akivoq.
Ullut suliffiusut ilarujussui pilersuinerup qularnaarnissaanut pitsaanerpaanngorsarnissaanullu Suulumut tunngavoq, taamaalilluni sapinngisamik ikinnerpaanik qamittoortoqassanngimmat. Tamanna ilaatigut ingerlatsiviit aserfallatsaaliugarinerisigut, aammalu ingerlatsinermi suliassanik isumaginnninnikkut pisarpoq.
Ajutoornerilli pisinnaapput, tamannalu pigaangat ingerlatsinermi sulisut pimoorutivillugu sulisarput:
”Qamittoortoqaraangat, imaluunniit kukkussutit pigaangata soorunami iluartuunngisaannarpoq, ajutoornerilli iluarsiniarlugit inuit tamarmik ulappunneranni ataatsimoorfiup pinngortup misigisarnera pitsaasuuvoq. Assersuutigalugu dieselimik immersuinerup nalaani nunaqarfiit ilaanni dieselimut tankip immap ernganik slangip immersuinera pisoqarfiuvoq. Ajornartorsiutaasup iluarsiniarnerani suleruliffigisatsitut ullut naajuitsut ilaasimapput, kikkulli tamarmik ikiuuffiannik pisoqarfimmi taama ittumi ataatsimoorfiusup maluginera nuannersuuvoq. Taamaattumik ullut soqutaarpianngitsut atunngisaannarpagut,” qungujulalluni Suulut oqarpoq.
Sunngiffimmi Suulut aamma suliassaaleqineq ajorpoq. Kalaallit Nunaanni Inuit Gamesimut nunamut tamarmut sungiusaasartuuvoq, Arctic Winter Gamesimi Kalaallit Nunaannut sinniisuutitaallutik peqataasussanik taakkuninnga nunamut tamarmut sungiusaasartoqatini peqatigalugu sungiusaasarluni. Taamaattumillu sulinerup aamma suliffiup avataani inuunerup akornanni oqimaaqatigiinnitsialaap piunissaa Suulumut assut pingaartuuvoq, tassunga tunngatillugu oqarmat: ”Siusinnerusumi maskinmesteritut suliutaa angalagaangama piffissat ilaanni ilaqutakka sivisuumik qimassimasarpakka. Maannakkut inuuninnut Nukissiorfinni sulisarnikka naleqqunnerujussuupput, tassami ilaqutannut sunngiffinnilu soqutigisannut piffissaqarnerulerama. Taamaattumik nammineq pimoorussannik timersoqqittalerpunga, siornalu Jysk Openimi aamma Rage Cupimi talermilluni unammiuaarnerit ajugaaffigaakka.”
2023-mi nunap immikkoortuani imminut tunniussaraluni iliuuseqarnerminut Ilulissani Nukissiorfiit iluani ukiumi suleqataasutut Suulut suleqatiminit toqqarneqarpoq. Suulutut ittunik inunnik pikkorillutillu piginnaanilinnik peqarnissarput Nukissiorfinnut pingaarluinnartuuvoq, taamaalilluta nuna innaallagissamik, imermik kiassarnermillu pilersorsinnaassagatsigu. Qujanartumillu tamakkuninnga amerlasuunik sulisoqarpugut.
Kikkunnut tamanut sulisartut ulluannik nuannersumik Nukissiorfiit kissaassivoq!
