Tallimanngorpat, ull. 22. marsi, ulluuvoq Erngup Ullua, tassaasoq imermut imigassamut minguitsumut tunngatillugu Naalagaaffiit Peqatigiit (FN-ip) sammisaqarfigisatut ullua. Pilersuisarfittut Nukissiorfinnit nunami innuttaasunut imermik imigassamik mingoqanngitsumik pilersuivugut, taamaattumillu nunatta ernga imigassaq assissaqanngitsoq sianigeqqorusukkatsigu Erngup Ulluanik malunnartitsiniarneq sioqqutsisumik iliuuseqarfigaarput.
Kalaallit Nunaanni imermik nunarsuarmi pitsaanerpaallunilu minguinnerpaap ilaanik peqarpugut. Imermik imigassamik isumalluutigisatsinnik pitsaassuseq attanniarlugu imeq imigassaq mingutsitsinermut, eqqakkanik simmarterinermut, akuutissanik aniatitaqartarnernut, aamma imikumut salinneqarsimanngitsumut illersuinissamut tamatta peqatigiilluta akisussaaffimmik tigusaqarnissarput aalajangiisuuvoq.
Taamaattumik erngup imermut imigassamut isumalluutaasumut kuutsitaasarfiisa sumiiffiini avatangiisuni, imaluunniit imeqarfinnut pallitsaaliugaasuni sunik suliarisanik pisoqartarnissaanut killilersuuteqartoqarpoq. Ataani videokkut imeqarfinnut pallitsaaliukkap suunera, aammalu tamakku iluini malittarisassat sorliit atuuttuunerat paasisaqarfigisinnaavatit. Malittarisassianik malitaqarnikkut peqatigiilluta imerput imigassaq assissaqanngitsoq paarisinnaavarput, aammalu uagutsinnut, aammalu siunissami kinguuaariiusussanut siunissami ukiorpassuanut imermut imigassamut minguitsumut attaveqarnissamik qulakkeerisinnaavugut.
Imeqarfiit pallitsaaliukkat il.il. pillugit annertunerusumik paasisaqarniaruit taava una takuuk.
