Saarlumi innuttaasut siunissami mingutsitsinnginnerusumik nukissamik tunisassiortoqalernissaa takorloorsinnaalerpaat, Nukissiorfiit inoqarfimmi innaallagissamik pilersuinermi sarfaliuutaasimasoq dieselitortoq taarseqqammermagu, aamma batterii toqqorsivik, aammalu seqerngup qinngornerinik katersuisarfik mikinerusoq inissillugit.
Tassaapput mingutsitsinngitsumik nuukkiartornermut iluaqutissat, inoqarfimmi manna tikillugu taamaallaat innaallagissiorfimmit dieselimik ingerlatitaasumit innaallagissamik pilersugaasimavoq.
Ukiumut dieselimik 3000 literinik sipaaruteqarneq
2024-mi ukiakkut Saarlumi innaallagissamik pilersuinermi pisariaqalersutut iluarsaassinermik suliaqarneq Nukissiorfiit aallartippaa, tamaanilu sarfaliuut dieselitortoq taarserneqarpoq. Taamaalisukkut batterii toqqorsivik 64 kWh-ilik (nal. akunneri kilowatt’it) inissinneqarpoq, taannalu inoqarfimmut sunniuteqarluarnerusumik innaallagissamik tunisassiornermik tunisisimavoq. Inissiinerup kingornatigut Nukissiorfiit dieselimik ingerlatsinermi nal. akunnerinik 2700-inik sipaaruteqarneq angusarereerpaa.
Batterii toqqorsivik sarfalersuutip dieselitortup atorsinnaassusianik sivitsuinermik ilalersuuteqarpoq, taamaalineranilu motoorit uninnganeranni Nukissiorfiit sulisuinut sullivimmi avatangiisinik pitsaanerusunik tunisivoq.
Upernaaq manna seqerngup qinngornerinik katersuisarfik 5,4 kWp (kilowaat-peak) ivertinneqarpoq, taannalu inoqarfimmi nukissamik pilersuinermut ilassuteqartitsivoq. Tamanna ukiumut dieselimik 3000 literit tungaannut sipaaruteqartitsissaaq. Ukiaru seqerngup qinngornerinik katersuisarfiup 15 kWp-nut annertusillugu sanaartornissaa pilersaarutaareerpoq.
Nunaqarfimmi immikkoortortaqarfimmi sulisut qutsavigerujussuarpagut, aamma nunap immikkoortua Kujallermi sulisunut qujangaarpugut, aammalu batteriip toqqorsiviup ivertitarinerani ikiuineranut suleqatigisarput PM Energi qutsavigaarput!
Maannakkut Kalaallit Nunaanni Nukissiorfiit seqerngup qinngornerinik katersivinnik 20-t angungajallugit peqalerput, ilaatigut Igalikumi (100 kWp), Ammassivimmi (30 kWp), aamma Nanortalimmi (100 kWp).
