Ull. 1. juuli 2024-mi Nukissiorfiit innaallagissamut, imermut aamma kiassarnermut akigititai iluarsaatissasut Naalakkersuisut aalajangiussimavaat. Nukissiorfiit imermut aamma innaallagissamut akigititaanik iluarsaassinerit Nukissiorfiit aningaasaqarnermini atugarisaanik tunngaveqarput, tamaani erngup aamma innaallagissamik tunisaqarnermit isertitat Nukissiorfiit ingerlatsinermut aamma aningaasaliisarnermujt aningaasartuutaanut naligiinngimmata. Ukiorpassuit ingerlaneranni Nukissiorfiit iluani 1,8 mia. kr.-t missaannik naleqartutut aningaasaleeqqinnissamut pisariaqartitat pinngoriartorsimapput, taakkulu amerlanersaat tassaapput pinasuartariallit. Taamaattumik Nukissiorfiit aningaasanik tigusinissamut pisinnaatitaaffia 70 mio. kr.-nit 105 mio. kr.-nut annertusisinneqarpoq, taamaalilluni pinasuartussatut aningaasaleeqqinnissamik pisariaqartitanit taakkunanit malitsigisaasutut piffissami sivikitsumi akiliisinnaassusermi ajugaaffigisassat annertusiartortut Nukissiorfiit isumagisinnaassammagit. Naggasiutitut 2024-mi apriilimiilli uuliap akianik qaffaanerup nassatarisaatut kiasarnermut akigititat aamma qaffanneqarput.
Innaallagiaq aamma imeq
Ull. 1. juuli 2024-mi innaallagissamut aamma imermut akigititaq 3,5 %-inik qaffanneqassaaq, aamma ull. 1. januaari 2025-mi 3,5 %-inik qaffanneqaqqissalluni. Imermut aamma innaallagissamut Nukissiorfiit akigitaanik iluarsaassinerit Nukissiorfiit aningaasaqarnermi atugarisaanik patsiseqarput, tamaani imermik aamma innaallagissamik tunisinermit isertitat Nukissiorfiit aningaasartuutaanut naligiinngimmata. Tassunga tunngasutut misissueqqissaarinerup takutippaa Nukissiorfiit 1,8 mia. kr.-nik nalilinnik aningaasaleeqqinnissamut pisariaqartitsisoq, taakkunanit amerlanerpaat tassaallutik pinasuartussat.
Innaallagiamut aamma imermut akigititat ull. 1. juuli 2024-mi
Tamatuma nassatarissavaa ull. 1. juuli 2024-mi kWh-ikkaanut innaallagiaq 1,75 kr.-nit 1,81 kr.-nut qaffassasoq, imermut m3-ikkaanut 21,20 kr.-nit m3-ikkaanut 21,94 kr.-nut qaffassalluni.
Innaallagiamut aamma imermut akigititat ull. 1. januaari 2025-mi
Ull. 1. januaari 2025-mi kWh-ikkaanut innaallagiaq 1,87 kr.-nut qaffassaaq, imermut m3-ikkaanut 22.71 kr.-nut qaffasslluni.
Kiassarneq
Kiassarnermut akigititaq ull. 1. juuli 2024-mi qaffassaaq. Ukiormanna ull. 3. apriilimi uuliamut akiusup, ilanngullugu dieselimut (solaarimut) akiusup literikkaanut 60 ørenik qafanneranik tunngaveqarluni akigititanik qaffaaneq pivoq. Tamatuma sumiiffinni Nukissiorfiit kiassarnermik tunisassiornermut uuliamik aamma dieselimik atuiffiani ingerlatsinermut aningaasartuutit qaffatsissimavai.
Kiassarnermut akigititat 1. juuli 2024-mi imatut qaffanneqassapput:
Kiassarneq aalajangersimasoq
Kiassarneq aalajangersimasoq kWh-ikkaanut 0,71 kr.-nit kWh-ikkaanut 0,83 kr.-nut qaffanneqassaaq.
Kiassarneq qaminneqarsinnaasoq
Kiassarneq qaminneqarsinnaasoq kWh-kkaanut 0,49 kr.-nit kWh-ikkaanut 0,56 kr.-nut qaffanneqassaaq.
Nukissiorfiit isertitaasa aamma aningaasartuutaasa oqimaaqatigiinnissaat Nukissiorfiit sulissutigaa
Ukiuni 20-ni tullinnguuttuni aningaasaleeqqinnissamut 1,8 mia. kr.-nik pisariaqartitsisoqartoq Nukissiorfiit misissueqqissaarinerata takutippaa, taamaattorli ukiut qulit siulliit pingaarnerpaatinneqarput. Ukiuni qulikkaani siullerni pinasuartuunerpaasussat pingaarnersiugaapput. Pingaarnerniittut tassaapput aningaasaleeqqinnissamut ukiuni qulikkaani siullerni ukiuni ataasiakkaani tamani Nukissiorfiit 134 mio. kr.-nik atuinissaa (2023-mi akiusut atorlugit). Tamatuma saniatigut maannakkut sanaartugaatinik aserfallatsaaliuiniarluni, aammalu ingerlatsinermut aamma aserfallatsaaliuinermut aningaasartuutaajuartunik attassiniarluni ukiumoortumik ingerlanneqartuartussamik aamma nalinginnaasutut aningaasaleeqqinnissamut pisariaqartinneqarput 150 mio.kr.-t.
Akigititanik qaffaanernut atatillugu Nukissiornermut pisortaq Cicilie Senderovitz nassuiaavoq:
”Aningaasaqarnermi oqimaaqatigiissitsinerup amigaataaneranik, aammalu pinasuartussatut aningaasaleeqqinnissamut pisariaqartitsineq tunngavigalugit akigititanik qaffaanissap atuutsilernissaa pisariaqarpoq. Maannakkut akigitani qaffaanerit pinngitsuussagutsigit Nukissiorfiit pilersaarutigisaatut aningaasaleeqqinnermi suliniutit arlallit kinguarteqqinneqassapput. Tamatuma nassatarissavaa qamittoornissamut aarlerinartoqarneq, naggataagullu pilersuinerup isumannaatsuuneranik tamanna ajortisaasinnaavoq.
Kalaallit Nunaanni innuttaasunut tamanut innaallagissamik, imermik aamma kiassarnermik taamaattuartutut pilersuinermik qularnaarisinnaanissarput Nukissiorfinnut qitiulluinnarpoq. Nunami sumiiffeqarfitsinni tunisassiornermut aningaasartuutigut assupilussuaq assigiinngiiaartumik tunngaveqarput, maannakkullu akigititatsigut innaallagissamik, imermik aamma kiassarnermik tunisinermut aningaasartuutitta aamma isertitatta akornanni aningaasaqarnermi oqimaaqatigiittoqanngilaq.
Nunami innuttaasunut sapinngisamik appasinnerpaatut akit atorlugit pitsaalluinnartumik pilersuinerup qularnaarnissaa sulissutigiuarparput, taamaattorli akit iluarsaattariaqarpagut, taamaalilluta akigititanit isertitatsigut pisarialittut ingerlatsinermi, aamma aningaasaliinermut aningaasartuutinik oqimaaqatigiissitsinissarput qanillinerussagatsigu. Taamaalisukkut aamma piffissaq eqqorlugu peqqissaaruteqarnissaq takutikkusupparput, taamaalilluni nunami tamarmi aamma taamaattuartutut pilersuisoqassammat, siunissami kinguaariinnut annertuumik akiligassaqartitsinissarput kingornussaritissanatigu.”
Aggustimi akiligassami akinik naleqqussaaneq takuneqarsinnaassaaq
Akinik naleqqussaaneq ull. 1. juuli 2024-mi atuutilissaaq, aammalu juulip qaammataanut atuinermut naatsorsuutaasumi aggustip qaammataani atuisartut pissarsiaanni fakturami (akiliutissat allattorsimaffianni) tamanna takuneqarsinnaassalluni.
Aamma faktura aamma atuineq Nukissiorfiit Atuisartunut nittartagaani takuneqarsinnaavoq (Forside (nukissiorfiit.gl)).
