Betoncentralen peqatigalugu Nukissiorfiit minguitsumik suleqatigiinnissamut isumaqatigiissummik atsiuivoq

Minguitsumut nuukkiartornermut suliaqarneq Nukissiorfiit iluani tassaavoq suliassat qitiusut ilaat, aammalu CO₂-mik aniatitsinernik annikillisaanerup ilaatut elektrokedelimik ivertiteralunilu ingerlatsinissaq pillugu Nuummi Betoncentralen peqatigalugu Nukissiorfiit isumaqatigiissut atsioqqammerpaa.

Tassaavoq minguitsumut nuukkiartornermut nutaarsiassatsialak, kissarsuummi uuliatortumi uuliamut taarsiullugu elektrokedelit innaallagiaq pingaarnertut kiassarnermut najoqqutarisatut atormassuk. Taamaalilluni suleqatigiinnissamik isumaqatigiissut Betoncentralenip uuliamik atuineranik annikillisaaqataassaaq, tassanilu ittutut kissarsuut uuliatortoq siunissami sillimmatitut pilersuutitut atorneqaannartarsinnaassaaq.

Ukiumut CO₂-mik 225,5 tonsit tikillugit sipaaruteqarneq

Maannakkut Betoncentralenip atugarisaanut 99 %-it assingannik ukiumoortumik uuliamik atugaqarnerup 85.000 literit tikillugit annikillisinneqarsinnaanerinik tamanna isumaqarpoq. Elektrokedeli ivertinneqareerpat ukiukkaani 225.5 tonsit tikillugit CO₂-mik aniatitsinerup annikillisinneranik tamanna nassataqarsinnaavoq.

Nukissiorfiit iluani suleqatigiilerneq nuannaalersitsivoq: ”Utoqqarmiut Kangerluarsunnguani erngup nukinganik nukissiorfimmik pilersaarutaasutut allisaqarnerup kingornatigut nukissamik sinneqartoorutip angisuup ilaanik Nuup tigusaqarsinnaassusianik piareersaalluta Nukissiorfiit iluani ulapputeqarpugut. Allisaqarnerup kingornatigut erngup nukinganit sarfamik minguitsumik kiassarnermut najoqqutarisatut iluaquteqarnissaq suli annertunerusumik periarfissaalissaaq. Taamaattumik Nuummi suliffeqarfinnik arlalinnik suleqateqarluta Nukissiorfiit iluani elektrokedelinik ivertiterinermik suliaqarpugut, peqatigalutalu minguitsumut nuukkiartornermut Betoncentralenip peqataalernera assorsuaq nuannaarutigaarput,” teknikkimut pisortaq Filip Sivertsen oqarpoq.

Taamaalilluni Kalaallit Nunaata CO₂-mik aniatitsineranut tamarmiusumut iluaqutaasussamik Betoncentralen Nukissiorfiit peqatigalugu minguitsumut nuukkiartornermut assigiinngissummik pilersitseqataavoq. Betoncentralenimi pisortaq, Knud-Erik Mogensen aamma iluarinnippoq, oqarlunilu: ”Nukissiorfiit peqatigalugu suleqatigiinnissamik isumaqatigiissummut Betoncentralenimi assut nuannaaruteqarpugut, taannami avatangiisinut aamma inuiaqatigiinnut iluaqutaasussamik piujuartitsinerusumik tunisassiornermik tunisaqassaaq. Suliffiup iluani tunisassiornermi piujuartitsinermik pitsanngorsaaniarluni Betoncentralen periusissialittut aamma anguniagaqarfigisatut suliaqarpoq. Betoncentralenip tamakkiisutut silap pissusianut takussutissarisaanut kissarsuut innaallagissamik ingerlatilik nutaaq assut pingaarutilittut siuariarfiuvoq.”

Suliniutip 2025-mi juunimit septembarimut suliarinissaa naatsorsuutigineqarpoq.

Elektrokedelimik ivertiterinissamut periarfissat pillugit illit suliffeqarfigisat annertunermik tusagaqarusuppat tamatigut Nukissiorfiit attaviginissaanut tikilluaqqusaavusi: https://nukissiorfiit.gl/kl/Nukissiorfiit-pillugu/Attavissat