Sullitat Nukissiorfiit Atuisunut Sullissivianut sianeraangamik nutaamik nammineq akisartoqalerpoq. Tamatumalu kinguneranik sullissisumik oqaloqateqalernissap tungaanut utaqqisarneq atorluarneqalerluni, utaqqinerup nalaani sullitap saaffiginnissutaa pillugu paasissutissanik sapinngisamik amerlanerpaanik katersisoqartalermat. Taamaattumik atuisunut sullissisortavut, sianertup tigunnginnerani ikiuilluarnerunissaanut piareersimanerulernerannik pilersitsivoq.
Siullermik sullitap isummerfigissavaa kalaallisut imaluunniit danskisut nammineq akisartoq ingerlanneqassanersoq. 1 tooraanni nammineq akisartoq danskisut oqaatsit atorneqassapput, utaqqiinnartoqassaarli nammineq akisartoq kalaallisut ingerlanneqassappat. Tamatumalu kingornatigut nammineq akisartut tusarnaarneqassapput, normulu saaffiginnissummut tunngassuteqartoq toqqarneqassalluni. Soorlu PBS-ikkut akiliisalerneq, akiligassaq, akiliisimanermut uppernarsaat, atuisutut imaluunniit atuiunnaarnermi nalunaarneq, najugarisap innaallagiaa qamitaasimappat, akiligassannik nukingisaarummik nassitsissimagaanni imaluunniit akiitsoqannginnermik uppernarsaammik piniarneq.
Oqarasuaatikkut nammineeluni akisartoq aamma kundeportal.nukissiorfiit.gl aqqutigalugu qanoq imminut ikiorluni sullinnissamik arlalinnik ilitsersuivoq. Tassanimi nammineq atuisutut imaluunniit atuiunnaarnermi nalunaartoqarsinnaammat, qanorlu annertutigisumik atuisimanerluni malinnaaffigineqarsinnaallunilu, PBS-imut ilannguttoqarsinnaavoq aammalu allarpassuit periarfissaallutik. Nukissiorfiit Atuisut Sullissivia atornera akeqanngilaq. Illuatungaanili Atuisunut Sullissivik aqqutigalugu sullinneqarneq akiitsoqartinneqarsinnaavoq akigitinneqartut allattorsimaffiit malillugit, assersuutigalugu akiligassap allartaata assiganik piniarneq 30 kr.-eqarpoq, aammalu uuttuummut ataatsimut atuilerneq, atuiunnaarneq 200 kr.-nik akeqarluni.
Aammattaaq oqarasuaatikkut nammineerluni akisartoq nassuiaasarpoq Atuisunut Sullissivimmut allakkatigut mail aqqutigalugu saaffiginnissummik pisariaqartitsisoqartillugu. Tamatumani pineqarpoq assersuutigalugu najukkami innaallagiaq qaminneqarsimappat, ikeqqinneqassappallu Nukissiorfiit akiligassap akilersimaneranut uppernarsaammik pissarseqqaarsimanissaa.
Oqarasuaammut aaqqissuussaq nutaaq sullitanut aamma Atuisunut Sullissivimmut sulisunut iluaqutaavoq. Sullitanut annertunerusumik paasissutissiivoq aamma kundeportal.nukissiorfiit.gl qanoq atornissaanut ilitsersuilluni. Tamanna ilutigalugu Atuisunut Sullissivimmi sulisunut iluaqutaavoq sullitap oqaloqatigilinnginnerani saaffiginnissutigineqartoq paasisaqarfigikannereersimassaneratigut, taamaalillutik sullitaq pitsaanerusumik ikiorsinnaanissaanut piareersimanerussallutik
