Aqqa Nuka Reimer 32-nik ukioqarpoq Nukissiorfiillu Kommuni Qeqertalimmi immikkoortortaata qitiusoqarfiani Aasianni ataqatigiissaarisutut atorfeqarluni. Atorfini pissanganartoq 2025-mi atorfigilersimavaa.
Ataqatigiissaarisoq sulerisarpa? Aqqa Nukap Qeqertalimmi sisamanik illoqarfittalimmi arfineq pingasunillu nunaqarfittalimmi ataqatigiissaarisutut suliani oqaluttuarai:
-Mekanikeritut ilinniagaqarpunga, tamannalu Nukissiorfinni nunap immikkoortuani ataqatigiissaarisuuninnut iluaqutigisarpara. Atorfiga pissanganartuuvoq, sorpassuarnik suliaqartarama, soorlu atortussanik pisiniartarnerni suleqataasarpunga aammalu innaallagisserisunik montørinillu illoqarfinnut allanukaasisarpoq nunaqarfiliaassilluniluunniit.
Qeqertalimmi illoqarfinnut allanukaassillunilu nunaqarfiliaassisartoq
Aqqa Nuka nunap immikkoortuani ataqatigiissaarisutut atorfimminut atatillugu imaatigut angallassinissamut piukkunnassutsimut allagartaqalersimavoq, taamaalillunilu imaatigut
angallatinik aqqaneq marluk tikillugit ilaasoqarsinnaasunik angallassisinnaalerluni.
Aqqa Nuka nangippoq:
- Uannut isumalerujussuuvoq suleqatinnut ikiuussinnaanera aammalu nunap immikkoortuani uani illoqarfinnut nunaqarfinnullu angallassinnaagakkit.
Taamaaliortarpugut ingerlatsivitsinnik aserfallatsaaaliineq ingerlaavartumik suliassaammat. Aamma Nukissiorfiit pisiniartarneri eqqarsaatigalugit piareersimasuusarpunga ikiuunnissamut kiisalu soorlu motoorinik iluarsaassaqaleraangat tunuarsimaartanngilanga.
Nangipporlu:
-Nukissiorfiit nunap immikkoortuani Qeqertalimmi ingerlatsivinnik sanaartugassaqartillugu ataatsimiinnernut aamma peqataasarpunga, sanaartornissamut akuersissutit pillugit kommuni attavigineqaqqaartarmat. Sulisutoqqat utoqqalisut inuusuttunit taarseriartuaarneqarnerat ilutigalugu nunap immikkoortuani tamarmi angallassisartorujussuanngornikuuvunga – naammagittaalliutissaqanngilangalu. Aqqa Nuka unnersiorpoq.
Ilinniagaqarnissaq pingaartuusoraa:
- Inuusuttut allat ilinniagarnissamut kaammattorusuppakka, taamalillutik siunissartik qulakkeersinnaassammassuk minnerunngitsumillu Nukissiorfinni nunatsinnilumi tamarmi inuussutissarsiornerup iluani ilinniagaqarsimasunik amigaateqaqigatta.
Aqqa Nuka Aasianniit kujammut Kangaatsialiaassisoq. Nukissiorfiit Qeqertalimmi immikkoortuani Aasiaat qitiusoqarfiuvoq. Immikkoortortaq Qeqertalik sisamanik illoqarfeqarpoq: Aasiaat, Qasigiannguit, Qeqertarsuaq aamma Kangaatsiaq, nunaqarfiillu arfineq pingasut tassaapput, Attu, Niaqornaarsuk, Ikerasaarsuk, Iginniarfik, Akunnaaq, Kitsissuarsuit aamma Kangerluk.
