Eqalugaarsunni nukissiaq minguinnersoq
Ukioq kingulleq seqerngup qinngornernik katersuisartunik aamma toqqorsivinnut batteriinut illoqarfinni nunaqarfinnilu arlalinni ikkussuinissamut pilersaarut aallartinneqarpoq. Eqalugaarsunni suliniut naammassingajalluinnalerpoq tamatumalu kingunerisaanik Nukissiorfiit pingaarutilimmik ingerlariaqqippoq ataavartumik nukissiamik pilersuinissamut.
Nukissiorfiit Nunap Imikkoortuani Kujallermi nunaqarfinni suliaqartartui ukioq manna ulapivipput. Tamaanimi suliniutit arlallit ingerlanneqarput. Ilaatigut Ammassivimmi hybrid-imik atortulersuineq naammassineqarpoq, Qassimiut nutaamik imeqarfittaarpoq, kiisalu Narsarmijini imermit nukissiorfik mikisoq pilersaarutigineqarpoq. Kisianni annertunerpaaq tassaavoq nunaqarfimmi Eqalugaarsunni nutaamik innaallagissiorfiliornissaq hybrid-inik atortulersuineq ilanngullugit.
Tamaanimi ikkussuuneqareerput seqerngup qinngornerinik katersuisartut 60 kW aamma toqqorsiviit batteriinut 167 kWh-inik pisinnaasaqartoq. Toqqorsivinnut batteriinut qulakkeerneqassaaq innaallagissamik nioqqutissiap sinneruttup seqerngup qinngornerinik katersuisartumiittuneersoq aamma generatorinik dieselitortuneersoq toqqorneqarsinnaalernissaa taamaalillunilu kingusinnerusukkut atorneqarsinnaalluni, tamatumunnga ilutigitillugu toqqorsiviit batteriinut qulakkiissavaat aalaakkaasumik innaallagissamik pilersuineq. Toqqorsiveqarnikkut batteriinut periarfissanngussaaq piffissami sivisunerusumi nunaqarfiup pilersorneqarsinnaalernera, naak motorit dieselitortut ingerlanngikkaluartut taamaaliornikkut generatorinut orsussaq taamatuttaaq ingerlatsinermut nalunaaquttap akuneri atorneqartut sipaarneqassapput.
Innaallagissiorfik nutaaq tassaavoq containerit tallimat: marluk dieselitortumut atortut aamma tavlinut atortut ataaseq, containerit sinneruttut marluk tassaassapput saffiorfik, allaffik aamma uninngatitsinermi kiassaanermut toqqorsiviit.
Containerit taakkua tallimat silataat oqorsakkanik qalligaapput taamaalilluni innaallagissiorfik ilutut nalinginnaasutut isikkoqassaaq.
- Containerit taakkua tallimat augustimi inissaminnut inissinneqarput, tamatumalu kingornatigut suleqatigisartagarput PM Energi septemberimi innaallagissiorfimmik ikkussuinermut ikiuuppoq. Seqerngup qinngornerinik katersuisartut pillugit suleqatigisartagarput, LED Solar Greenland, septembarip naalernerani aamma oktobarip aallartinnerani seqerngup qinngornerinik katersuisartut ikkussorneqarnerat isumagaat, nunaqarfimmi sumiiffinni assigiinngitsuni atortut sisamat ikkussuuneqarput, Kujallermi nunap immikkoortuata pisortaa Lars Hoffmeyer oqaluttuarpoq.
- Nunaqarfinni suliaqartartut namminneq containerit tallimat toqqavissaat suliarivaat, ilanngullugu ilisimatitsivoq.
Seqerngup qinngornerinik katersuisartut atortunut sisamanut agguarneqarput, atortut innaallagissiorfiup eqqaani aamma qaavani, kommunip allaffiani, utoqqaat illuanni napasunik tunngavilerlugit ikkussuuneqarput aamma nunami qaarsumut ikkussorlugit. Nunaqarfimmi katillugit seqerngup qinngornerinik katersuisartut 176-it ikkussuunneqarput.
Kusassaanerit kingulliit nunaqarfinni suliaqartartut suliumatuut suliaat tassaapput innaallagissiorfiup eqqaani tunngavinnik napasunik ikkussuineq aamma maannakkut innaallagissiorfiup piiarneqarnissaanut piareersaaneq. Suliniut tamarmik atorneqalissaaq qaammatip matuma ingerlanerani (oktobari).
Atortunik hybrid-iusunik nutaanik ingerlatsinermik misilittakkat pitsaapput. Sapaatit akunnerisa siulliup atortut hybrid-iusut ingerlanerani motoorit taamaallaat unnuakkut nal. akunneri pingasut ingerlapput piffissami nal. 20.00-imut nal. 08.00-ip tungaanut, tamatuma saniatigut seqerngup qinngornerinik katersuisartut nunaqarfimmut nioqqutissiorneq ullup qiteqqunnerani nalunaaquttap akunnialunnguini tamakkerlugu ingerlappaa.
Eqalugaarsuit saniatigut seqerngup qinngornerinik katersuisartut toqqorsivinnik battereeqartut nunaqarfinni ukunani pilersinneqarput; Igaliku, Ammassivik aamma Ikerasaarsuk, taamatuttaaq Qeqertarsuatsiaani, Qeqertami aamma Ittoqqortoormiini aammattaaq piffissap matuma ingerlanerani seqerngup qinngornerinik katersuisartunik ikkussuisoqarpoq. Nukissiorfiit maannakkut seqerngup qinngornerinik katersuisartunik 13-inik peqarput aamma toqqorsivinnik battereeqartunik sisamanik. Seqerngup qinngornerinik katersuisartut aamma toqqorsiviit batteriit sakkortussusiat aamma sumiinnerat tabelimi tulliuttumi takuneqarsinnaapput:
| Illoqarfik/nunaqarfik | Seqerngup qinngornerinik katersisartut pisinnaasaat kWp | Toqqortivinnik battereeqartut pisinnaasaat kWh |
|---|---|---|
| 016 Ammassivik | 33 | 167 |
| 060 Nuuk | 17,3 | 0 |
| 061 Qeqertarsuatsiaat | 97,5 | 0 |
| 071 Atammik | 21,6 | 0 |
| 090 Kangaatsiaq | 9,8 | 0 |
| 098 Ikerasaarsuk | 78 | 167 |
| 122 Qeqertaq | 48,75 | 0 |
| 123 Saqqaq | 17,7 | 0 |
| 143 Kangerluk | 12 | 0 |
| 150 Uummannaq | 36 | 0 |
| 190 Ittoqqortoormiit | 58,5 | 0 |
| 022 Eqalugaarsuit | 60 | 167 |
| 032 Igaliku | 100 | 200 |
| Ialt | 590,15 | 701 |
Seqerngup qinngornerinik katersuisartunut aamma toqqorsivinnut battereeqartunut misilittakkat pitsaasuupput, Nukissiorfiillu pilersaarutigaat ingerlaavartumik atortunik taamaattunik pilersitsiortornissaq aamma annertusiartortitsinissaq.
Suliniut Naalakkersuissut Nukissiuuteqarnermut imermillu pilersuinermut immikkoortumut pilersaarutaanut ilaavoq, ataavartumik nukissiorneq sumi tamani ajornanngitsillugu pilersuinermut atorneqarnissaanut anguniagaq Nukissiorfiit suli sulissutigaat. Suliniutit taakkua iluaqutaassapput aamma kingunerissavaat uuliamik atuilluni pilersuineq annikinnerusoq aamma ataavartumik nukissiamik pilersuineq annertunerusoq. Suliniut pillugu Nukissiorfiit nittartagaanni annertunerusumik atuarit aqqutigalugu link:
https://nukissiorfiit.gl/kl/Nutaarsiassat/2020/Mingutsitsinngitsumik-nukissiaq-siaruariartorpoq