Kiassaaneq eqqakkanik ikuallaanermit

Illoqarfinni ukunani Nukissiorfiit ungasianiit kiassaaneq eqqakkanik ikuallaanermi pilersinneqartoq siammartertarpaa: Nuummi, Maniitsumi, Sisimiuni aamma Ilulissani. Illoqarfinni taakkunani ikuallaaviit kommunip pigisai ungasianiit kiassaanerup aqqutaanut atassuteqarput, taamaalilluni ikuallaanermi nukik atunngitsuugaq kissamik pilersitsinermut atorneqartarluni.

Nukimmik imermillu pilersuinermut pilersaarummi atuarneqarsinnaavoq eqqakkanik ikuallaaneq nukimmik atuilluarnermut periarfissatsialaasoq. Taamaammat iliuusissat misissuinerullu eqqakkanik aaqqissuinerup allanngortinnissaanut tunngasut ingerlanneqassapput. Aamma ungasianiit kiassaanermut aqqutit amerlineqarsinnaanerat eqqakkanik ikuallaanerit amerlineqarsinnaanerannut periarfissiipput.