Maajimut Nukissiorfinni pisortaq arnaq siulleq, Cicilie Senderovitz, ukiuni marlunni pisortatut issiasimalissaaq. Tamaani nunatsinni innuttaasunut innaallagissamik, imermik kiassarnermillu pilersuisarneq pitsaalluinnartoq isumannaarniarlugu aaqqissuussiffiup sinnerinittut suleqatigai, tassaavorlu suliassaq Ciciliep assut pingaartitaa.
Nukissiorfiit piujuartitsisutut sammivissaanik pilersitsiniarneq pillugu assut sammisaqarnermik tamanna nassataqarsimavoq, silap pissusianut suliassaqarfik kisiat pinnagu, aammali ingerlatsinermut aningaasaqarnermullu tunngatillugu, tamakkulu pillugit Cicilie imatut oqaaseqarpoq: ”Uannut pingaarluinnartuuvoq Nukissiorfiit aningaasaqarnikkut sunniuteqarluartutut ilusilimmik, minguitsumut nuukkiartornermik sianiginnillunilu siammarterisumik, pilersuinermik isumannaatsumik attassinissaa. Taamaalilluta nunami innuttaasunit ukiut aamma qulit, 20-t 30-llu atugarilernerini innaallagissamik, imermik kiassarnermillu pitsaalluinnartumik pilersuinikkut isumannaassutsimik, sapinngisamik siamasissumit nukissiornermi najoqqutarisanit atajuartunit pisuneersunik neqerooruteqarsinnaanerput qularnaassavarput. Taamaattumik periusissialikkatut anguniagaq: ”Nukissiorfiit patajaatsoq” aallaavigalugu suliaqartuarpugut, tassalu pilersuinermut isumannaatsumut, sunniuteqarluartutut pilersuinermut, minguitsumut nuukkiartornermut, aningaasaqarnermut tunngasumut, inuttassarsiornermut, aamma aaqqissuussiffimmi kulturimut tunngasutigut ilanngussuilluta.”
Suulli tamarmik teknikkimut ingerlatsinermullu tunngasuunngillat. Pisortatut inissisimaffiup ilarujussua Ciciliemut aamma sulisut akornanni aalaakkaassutsimik suliffigisamillu iluarinninnerup qaffasinnissaata pilersinnissaanut tunngavoq, tamannalu Ciciliemut pingaarutilittut ippoq: ”Sulisut pikkorissorpassuit piginngikkutsigit taamatut ittutut Nukissiorfittut ittumik inuiaqatigiinnut pingaarutilittut aaqqissuussiffimmik ingerlatsisoqarsinnaanngivippoq. Taamaattumik ingerlatsinerup aamma pilersuinerup isumannaatsuunissaata saniatigut aamma atugarissaarnerup isumaliutiginissaa uannut pingaartuuvoq, taamaalippammi suliartorneq nuannerlunilu iluarisimaarnassammat.
”Nukissiorfiit ukiut marlunngulerput aallartiffigigakkit aaqqissuussiffiup ataqatigiiffimmut ataatsimut inissinniarnissaa uannut pingaaruteqartuuvoq, tamaani kikkut tamarmik assigiimmik pineqartassallutik, sulisullu sapinngisamik annertunerpaamik ilaatinneqartassallutik,” Cicilie oqarpoq.
Ukiuni marlunni Nukissiorfiit iluani pilersuinermik suliassaqarfimmi annertuunik pisoqarsimavoq, ingerlatsivitsinni aningaasaleeqqinnerpassuaqarluni, aammali aaqqissuussiffimmi kultureqassutsimi, sulisut akornanni atugarissaarnissaq, aamma piginnaasatigut kivitsisoqarnissaq annertunermik sammineqarnerulersimallutik.
Pisortatut arnaanini Ciciliep isumaliutigisarneraa aperineqarami akissutaa imaappoq: “Taamaavinngilaq. Siusinnerusumut naleqqiullugu sungiusimasamut naleqqiullugu uanga ileqqorisara immaqa najoqqutassialigaannginneruvoq, uangami najoqqutassialigaasunut pikkoriffeqarpallaanngilanga. Uanga pissuserisara atorusunneruara, tamannalu manna tikillugu ajorpallaanngitsumik ingerlasimavoq,” qungujulaannguaq oqarpoq.
Nukissiorfiit nunarsuaq tamakkerlugu arnat ulluannik kikkunnut tamanut pilluaqqusivoq.
