Nukissiorfiit pisortaqarfiani allanngortitsinerit

Nukissiorfimmi pisortap nutaap atorfinitsinnissaa tikillugu ikaarsaariarfissaq pitsaasoq qularnaarniarlugu maannakkut aningaasaqarnermut pisortaq, Johan Danielsen Nukissiorfiit iluani nukissiornermut pisortaagallartussanngortitaavoq. Johan Nukissiorfiit iluani aningaasaqarnermut pisortatut atuuffeqartuassaaq.

Juulip naanerani Nukissiorfiit teknikkimut pisortaa, Hans Rowedder atorfimminit soraarpoq. Taamaattumik teknikkimut pisortap nutaat atorfinitsinnissaata tungaanut Nuummi nunap immikkoortuani pisortaq Filip Sivertsen Nukissiorfinni teknikkimut pisortaagallartussanngortitaavoq.

Filip Nuummut nunap immikkoortuani pisortatut atuuffeqartuassaaq.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup nukissiorfimmut pisortamik nutaamik inuttassarsiniarluni ingerlassaq aallartisarsimavaa.

Teknikkimut pisortamik nutaamik atorfinitsitsinissamut ingerlassamik Nukissiorfiit nammineq aallartisaasimavoq.

Taamaalilluni atorfiit inuttalerneqarnissaasa tungaannut Nukissiorfiit pisortaqarfiata inuttarissavai Johan Danielsen, nukissiorfimmi pisortaagallartoq, aamma aningaasaqarnermut pisortaq, Filip Sivertsen tassaasoq teknikkimut pisortaagallartoq, aamma Sandra Manata pisortaqarfimmi pisortaq.