Nukissiorfiit teknikkimut pisortartaartoq

Filip Sivertsen, savalimmiormiunik siuaasalik Nuummi inunngorlunilu alliartorpoq, ilinniakkamigullu maskinmesteriulluni. Nukissiorfiit iluani ukiut 13-it sinnerlugit, siullertut sulisunut aqutsisutut, tulliatut ingerlatsinermut pisortatut, ukiunilu kingullerni pingasuni Nuummut nunap immikkoortuanut pisortatut Filip Kalaallit Nunaanni aamma Nukissiorfiit iluani pilersuinermik immikkoortoqarfimmut tunngasunik assupilussuaq ilisimaarinnittuuvoq. Taamatuttaaq Filip teknikkimut tunngasunik patajaatsunik tunuliaqutaqarpoq, taamaalillunilu pisortaaneqarfik teknikkikkut pingaarutilinnik ilisimasaminik ilassuteqarsinnaassaaq.

”Nukissiorfiit iluani Filip Sivertsenip teknikkikut pisortatut atorfinitsinnera assut nuannaarutigaara. Kalaallit Nunaanni atuisartunut iluaqutaasussamik pilersuinikkut isumannaatsuutitsinermik annertuumik sunniuteqarluartumillu qularnaarinissamut suliaqarnermi Filip annertuumik inissisimaffeqassaaq. Aammattaaq Filip assut ilakkuminarlunilu nuannarisaavoq, pisortaaneqarfimmilu ilaasortatut aalajangersimasumik inissisimaffeqalernissaa qilanaaraara,” Nukissiorfiit iluani nukissiornermut pisortaagallartoq, aamma aningaasaqarnermut pisortaq Johan Danielsen oqarpoq.

Nukissiorfiit pisortaaneqarfiata maannakkut inuttarilerpai nukissiornermut pisortaagallartoq, aamma aningaasaqarnermut pisortaq Johan Danielsen, teknikkimut pisortaq Filip Sivertsen, aamma atorfilittanut pisortaaneq Sandra Husted Rasmussen.

Atorfinitsitsineq tamanna nangillugu Nuummut nunap immikkoortuanut pisortamik nutaamik inuttassarsiuineq Nukissiorfiit aallartisarniarpaa.