.jpg?w=1920&sh=5369d)
2023-mut Nukissiorfiit ukiumoortumik naatsorsuutai maanna saqqummerput
2023-mut Nukissiorfiit amigartooruteqarnermik kinguneqarpoq, tamatumunngali paasissaalluartunik nassuiaatissaqarpoq, ilaatigut makkuninnga:
- 2023-mi pingaarnertut iluanaarfiusanngitsuni inoqarfinni minnerusuni immikkut ittunik Nukissiorfiit aningaasaleeqqissimavoq. Sumiiffinni minnerusuni pilersuinerup aamma qularnaarnissaanut aningaasaliinerit pisariaqarput.
- Ulloq 1. januaari 2023-mi Kangerlussuarmi, Narsarsuarmi aamma Qaarsuni pilersuinissamut pisussaaffigisaq Nukissiorfiit tiguaa. Sumiiffinni pineqartuni ingerlatsinermi aningaasartuutit isertitat qaangersimavaat, ilanngullugit ingerlatsinermut tapiissutit. Sumiiffinnilu taakkunani aamma assut iluarsaassinissamik pisariaqartitsisoqarpoq.
- Utoqqarmiut Kangerluarsunnguanni, kiisalu Aasianni / Qasigiannguani erngup nukinganik nukissiornissamik suliniutit ukiut arlerlugit Nukissiorfiit aningaasartuuteqarneranik nassataqartitsisimapput. Piffissami 2018-imit 1. januaari 2023-mut aningaasartuutinut akiliutigisimasanut Nukissiorfiit taarsiivigineqanngilaq.
Aaqqissuussiffiup ineriartortinnissaanik, aammalu najoqqutassiani pingaarutilinni tamani aaqqissuussiffimmik oqimaaqatigiissumik pilersitsinissamik Nukissiorfiit ingerlatariuakkaminik alaatsinaataqarpoq. Taamaattumik aamma 2023-mi piffissamut ungasissumut periusissiamik, ”Nukissiorfiit 2030-mi Patajaatsut” Nukissiorfiit suliarisimavaa, taanna aamma ilaatigut annertuumik aningaasaleeqqinnissamik pisariaqartitsinermik sianiginnilluni. Suliassaqarfinni pingaarnerpaani periusissiaq pingaarnersiuivoq:
- Pilersuinermik qulakkeerinninneq
- Pilersuineq pitsaasoq
- Mingutsitsinngitsumut ikaarsaariartorneq
- Suliffeqarfimmi kulturi aamma piginnaasat
Silap pissusiani suliassaqarfik kisiat pinnagu aammali ingerlatsinermut tunngasumik, aningasaqarnermut aaqqissuussiffimmullu piujuartitsisumik Nukissiorfiit periusissiamik pilersitaqarfiunissaat tamaani pineqarpoq. Siunertaq tassaavoq pilersuinermik pitsaasumik qulakkeerinissaq, Nukissiorfiit isertitaasa aningaasartuutaasalu akornanni oqimaaqatigiinnermik pilersitsinissaq, kiisalu aaqqissuussiffimmi peqqissumik kultureqarnissaq.
Mingutsitsinngitsumut ikaarsaariartorneq aamma 2023-mi assut alaatsinaanneqarpoq, tamaani illoqarfinni inoqarfinnilu minnerusuni atajuartussanik iluarsiissutinik siammarterinissaq pillugu Nukissiorfiit sulissuteqarsimalluni.