Nunavumit tikeraarneqarnerit pissarsinartut

Nunavut aamma Nukissiorfiit akornanni ilisimasanik agguataarineq, aamma misilittakkanik paarlaateqatigiinneq.

Aasap ingerlanerani Nukissiorfiit Nunavumit aallartitanit pingasunit tikeraartoqarnini nuannaarutigaa. Aallartitat nukissiornermut aamma silap pissusianut naalakkersuisuni immikkoortoqarfimmit, aammalu Nunavut Tunngavik’mi siulersuisuneersut aamma sulisorisat tikeraartuupput.

Tikeraarnernut tamanut assigiissutaasoq tassaavoq qanoq ililluta uagut Nukissiorfinnit Kalaallit Nunaannik tamarmiusumik pilersuisarnermik suliaqartarnitsinnik paasisassarsiorneq, kiisalu Nukissiorfiit minguitsumik nukissamik tunisassiorneranik ilisimasaqarnerulernissaq pillugu Nunavumeersut annertunermik tusagaqarusunnerat.

Silap pissusia Kalaallit Nunaanniittumut assingusoq

Nunavut tassaavoq Canadap avannarlerpaani inissisimasutut naalagaaffiup ilaa namminersortoq. Nunavumi silap pissusia arlalitsigut Kalaallit Nunaanni silap pissusianut assinguvoq, aammalu issittumi qeqertakkuutaanik iluseqartiterpoq. Taamaattumik misilittakkanik paarlaateqatigiinnissamut periarfissatsialaqarpoq, aammalu silap pissusiani issittumi nukissiornermik pilersuinermik tamatta immikkut qanoq suliaqartarnerput pillugu tusagaqarusunnarluni.

Tikeraarnerit Nukissiornermik sullissisarfimmi, aamma Nuummi qullersaqarfimmi pipput, taakkunanilu nunap immikkoortuanut pisortap, Filip Sivertsenip ilaatigut Nukissiorfiit nukissamik atugaata 66-71 %-ia nukissaqarfinnit atajuartunit, soorlu erngup nukinganit, aamma seqerngup aamma anorip nukinginit pineri oqaluttuarisinnaavai.

Misilittakkanik paarlaateqatigiinneq naleqarluartoq

Nunavumit tikeraarnerit silap pissusiani issittuusumi nukissamik pilersuinerup nassatarisaanik ajornartorsiutinik tamakkuninnga oqallilluarnernik nassataqarput, soorlu ukiup affaani ukiuusumi ississutsimut, aamma pilersuinernut tunngatillugit ajugaaffiginiartakkat oqaluuserineqarlutik. Assorsuaq sumiiffiiti ungasissuseqartut akimorlugit innuttaasunut Nunavut, Nukissiorfiit assigalugu, innaallagissamik, imermik aamma kiassarnermik pilersuisartussaanera pillugu tusagaqarneq pissanganarpoq.

Suliffeqarfiusut assigini allanik naapitsinissamut tamatigut periarfissaq pingaaruteqartuuvoq, Nunavumillu tikeraarnerit taakku pingasut aamma taama ipput. Tassani Nukissiorfiit nammineq misilittakkaminnik agguaassisinnaavoq, aammalu siunnersuutinik attuumassutilinnik pissarsivoq, kiisalu ilisimasanik paarlaateqatigiippoq.