Qaqortumi kiassarnermut nalimmassaat nutaaq sammineqartoq

Qaqortumi kiassarnermut nalimmassaammik (varmepumpimik) nutaamik ivertitsinissaq pillugu piareersaaritut suliniummut Nukissiorfiit, INI A/S, aamma Kommune Kujalleq peqatigiillutik ingerlataqarput. INI-p / kommunip inissiaateqarfiisa ilaanni silaannarmik-imermik kiassarnermut nalimmassaat nutaaq aasaq sioqqullugu Nukissiorfiit inaarutaasumik ivertissimavaat. Katillugit 30 kW-inik piginnaasaqarnermigut kiassarnermut nalimmassaat, elektrokedelimik (innaallagissamik kiassarnermik qaminneqarsinnaasumik) aamma kissarsuummik uuliatortumik sunniivigeqateqartumik inissianut katillugit 24-nut taakkununnga innuttaasunut siunissami kiassarnermik pilersuissaaq.

Kiassarnermut nalimmassaat tassaavoq silaannarmik imaluunniit nunami nukissamik tamaaneereersumik iluaquteqarnermigut kiassarnermik pilersuuteqartutut nukissamik atuilluartutut kiassaanermik periaasiuvoq.

Nukissiorfinni suleqatigiinni aqutsisoq Kjell Bermann suliniut pillugu ima oqaaseqarpoq:

”Kiassarnermut nalimmassaatip nutaap ivertinneratigut kiassarnermik pilersuinerup sunniuteqarnerusup pilersuutiginissaa naatsorsuutigaarput, taannalu kiassarnermut nalimmassaatinik aqutsinermik aamma ingerlatsinermik, kiisalu sumiiffigisani atugaasuni sunniuteqarnerinik Nukissiorfinniittugut pitsaanerusumik paasisaqartissaavaatigut.”

Kujataani pissutsit pitsaasut

Inissiaataasumi tassani Nukissiorfiit piareersaatitut suliniummik suliaqarnissaminik toqqagaqarpiarneranut tunngavigisaq ilaatigut tassaavoq suliniummi toqqammavigisat, tamaaneereersutut qitiusumit kiassaanermut aaqqiissutaasutut iluseqartut suliniummut pineqartorpiamut naammaginartumik pitsaassuseqarsimaneri.

Nukissiorfiit kiassarnermut ingerlatsinermi siunnersortaa Esben Lundø Madsen oqarpoq:

”Kujataani kiassarnermut nalimmassaammut piareersaatitut suliniummik suliarisaqarusunnitsinnut patsisaasoq tassaavoq Qaqortumi nukissamik pitsaanerpaanngorsaarusunnerput, tamaanimi erngup nukinganik nukissiorneq killissaqarpoq – tassanilu minguitsumik erngup nukinganit nukissiornermit annertunerpaamik pissarsiaqarnissamut periarfissat misissussavavut. Tulliatut kiassarnermut nalimmassaammit inernerisat pissarsiarinissaannut naatsorsuutigisatsinnut Kujataani pissutsit iluarinarnerupput, tamaanimi silap pissusia atoruminarneruvoq, taamaattumillu kiassarnermut nalimmassaatip pitsaanerpaaffigisaanut naleqqiullugu naleqqunnerpaalluni. Aallarniutitut suliniutikkut ilaatigut tigussaasumik ilikkagaqarnissaq angorusupparput, aammali sumiiffigisami kiassarnermut nalimmassaatip piginnaasaa pillugu ilisimasaqalerusuppugut. Taamaattumik paasissutissanik katersuineq aamma nakkutiginisaqarneq assut sammisaraarput, taamaalilluta ivertitaq ingerlatariuakkatsinnik nalilersorsinnaagatsigu, aamma naleqqussarsinnaallugu.”

Nukissiorfiit, taamaalillutillu inuiaqatigiit nukissap sapinngisamik pitsaanerpaamik atugaanissaa assut soqutigisaraat, ilaatigut aningaasaqarneq pissutigalugu, aammali silap pissusianik sianigisassanut tunngatillugu. Aallarniutitut suliniutikkut Nukissiorfiit nukissiornermik pitsanngorsaasinnaanini naatsorsuutigaa, imatut ilillugu, ukiup ingerlanerani innaallagissamik 1 kWh-imik pilersuisoqaraangat 2,7 kWh-imik kiassarnermik tunisassiornissaq naatsorsuutigineqassalluni. Taamaattumik aallarniutitut suliniut Nukissiorfiit aamma inuiaqatigiit siunissami pilersuinikkut iluarsiissutaannut pingaaruteqartutut isigineqarpoq.

Annikinnerusutut aallarniutitut suliniutip taassuma saniatigut Kujataani kiassarnermik nalimmassaammik suliniummik suli allamik Nukissiorfiit misissueqqaarinernik aallartitaqarpoq. Maannali allatut annertussusilimmik, avataanit kiassarnermik attaveqarfimmi qitiusutut inissisimasumik kiassarnermik nalimmassaassummik pilersuinermik ilassuteqarnissamut periarfissaasunik Nukissiorfiit misissuinissamik kissaateqarmat.